Það var 221 flugmaður við störf hjá Icelandair þegar sumarvertíðin í ár hófst en til samanburðar voru flugmennirnir 562 talsins sumarið 2019.
Og nú herma heimildir Túrista að innan raða Icelandair sé horft til þess að endurráða á bilinu 160 til 180 flugmenn fyrir næsta sumar. Þar með gætu umsvifin í áætlunarflugi félagsins orðið hátt í tvöfalt meiri en þau voru nú í sumar.
Eins og gefur að skilja þarf Icelandair samhliða þessu að ráða fleiri flugfreyjur og flugþjóna til að manna þoturnar sem fljúga munu farþega félagsins til og frá Keflavíkurflugvelli.
Icelandair er þó ekki eitt um að ætla að bæta við mannskap því að samkvæmt upplýsingum frá Play mun félagið í næstu viku auglýsa eftir áhöfnum fyrir næsta sumar. En flugfloti Play stækkar úr þremur þotum í sex næsta vor.