Forstjóri Keahótelanna segir fyrirtækið standa styrkum fótum eftir endurskipulagningu og endurfjármögnun í viðtali við viðskiptakálf Morgunblaðsins í fyrradag. Í umfjöllun blaðsins er ekki minnst á að K-acquisitions, móðurfélag Keahótelanna, varð gjaldþrota í ársbyrjun. Kröfur í þrotabúið námu 3,8 milljörðum króna en engar eignir fundust.
Allt hlutafé í Keahótelunum var áður helsta eign K-acquisitions en eigendur þess stofnuðu í lok síðasta árs nýtt félag sem fékk heitið Prime hotels ehf. Það félag hélt eftir 65 prósent hlut sinn í hótelkeðjunni á móti Landsbankanum sem breytti skuldum í hlutafé.
Hversu háar fjárhæðir bankinn afskrifaði vegna þessa hefur ekki fengist upplýst en gamla móðurfélagið skuldaði bankanum 1,8 milljarð króna í árslok 2019. Sú skuld er tilkomin vegna fjármögnunar bankans á kaupum K-acquisitions á Keahótelunum árið 2017. Þar seldi sjóður í vörslu Landsbréfa, dótturfélags bankans, stóran hlut.
Engar upplýsingar veittar
Landsbankinn er í dag stærsti hluthafinn í Keahótelunum en þar á bæ fást engin svör um hvort bankinn ætli eða hafi lagt fé í þá stækkun sem forstjórinn hótelkeðjunnar boðar. Svar bankans við fyrirspurn Túrista er einfaldlega svohljóðandi: „Landsbankanum er óheimilt að tjá sig um málefni einstakra viðskiptavina.“
Túristi hefur einnig óskað ekki fengið svör frá forstjóra Keahótelanna um hvort meðeigendur Landsbankans hafi lagt félaginu til aukið fé. En samkvæmt tilkynningu sem þeir sendu út í ársbyrjun þá lögðu þeir á þriðja hundrað milljónir í reksturinn í tengslum við breytingar á eignarhaldi hótelkeðjunnar. Ekkert svar hefur borist.
Kínverskir hluthafar
Sjóður í vörslu bandaríska fjárfestingafélagsins Pt Capital átti helmingshlut í gamla móðurfélagi Keahótelanna og fer því í dag með nærri þriðjung í Keahótelunum. Ögn minna en Landsbankinn. Meðal hluthafa í sjóði Pt Capital er dóttir og einn fjárfestingarstjóra kínversks milljarðamærings sem handtekinn var á síðasta ári vegna meints fjármálamisferlis í heiamlandinu. Frá þessu greindi Viðskiptablaðið í gær.
Auk eignarinnar í Keahótelunum á þessi bandaríski sjóður líka símafyrirtækið Nova.
