Grímuskylda í farþegaflugi innan Skandinavíu hefur verið felld niður og bólusettir Norðmenn geta ferðast til langflestra landa Evrópu án þess að fara í PCR-próf fyrir brottför.
Það á þó ekki við ef ferðinni er heitið til Íslands og því hafa stjórnendur SAS í Noregi ákveðið bíða með frekari áætlunarflug til Íslands. Þetta staðfestir talsmaður félagsins í svari við fyrirspurn Túrista. Hann bætir við að vetraráætlun félagsins geri aðeins ráð fyrir nokkrum ferðum frá Ósló til Íslands í kringum jól og áramót.
Íslandsflugi SAS frá Kaupmannahöfn verður þó haldið áfram og gert er ráð fyrir fjórum til fimm brottförum í viku nú í vetur.
Um síðustu mánaðamót gáfu norsk stjórnvöld grænt ljós á ferðalög út í heim og bólusettir ferðamenn frá löndum EES-svæðisins og Bretland mega ferðast til Noregs án þess að framvísa Covid-prófi við komuna þangað. Í kjölfarið tók sala á utanlandsferðum mikinn kipp í Noregi.