Vikan byrjaði illa fyrir fjárfesta í SAS því þá féll gengi félagsins um nærri fimmtán af hundraði í kjölfar viðtals við nýjan forstjóra félagsins. Þar sagði hann félagið í raun berjast fyrir lífi sínu.
Þessi ummæli fóru illa í marga en skandinavískir greinendur voru líka hissa á þessari miklu niðursveiflu. Forstjórinn hefði nefnilega ekki sagt neitt nýtt því vitað væri að staðan væri þung. Örvænting fjárfesta væri því dæmi um að margir hefðu sett pening í SAS með bundið fyrir augun eins og einn greinandinn komst að orði.
Gengi SAS fór svo áfram niður á við og heildarlækkun vikunnar nam 17,5 prósentum. Ekkert annað flugfélag missti flugið eins svakalega í norrænum kauphöllum í vikunni eins og sjá má hér fyrir neðan. Icelandair og Play lækkuðu þó bæð en fjárfestar tóku vel í uppgjör Finnair og Norwegian sem birt voru á miðvikudag og fimmtudag.