Farþegar á leið milli Keflavíkurflugvallar og höfuðborgar Bretlands hafa haft úr ferðum fjögurra flugfélaga að velja síðustu mánuði. Nýliðinn á þeim markaði er Play og þar voru óseldu sætin flest í síðasta mánuði.
Því eingöngu 2.371 farþegi nýtti sér ferðir félagsins til og frá Stansted samkvæmt tölum frá breskum flugmálayfirvöldum. Þar með hefur sætanýtingin verið rétt um 44 prósent miðað við framboð Play til London í september. Þetta er þó framför frá því í ágúst þegar aðeins þriðja hvert sæti var selt á þessari flugleið. Þá var framboð félagsins reyndar meira en það var í síðasta mánuði.
Í áætlunarferðum Easyjet til Luton var nýtingin mun betri eða 63 prósent enda voru farþegar í Íslandsflugi félagsins, til og frá London, 3.753 talsins í september.
British Airways og Icelandair halda bæði úti ferðum til Heathrow flugvallar en Túristi hefur ekki undir höndum sundurliðun á farþegahópi félaganna tveggja. En í heildina flugu 14.995 farþegar milli Keflavíkurflugvallar og Heathrow í síðasta mánuði. Sætaframboðið nam aftur á móti 22.808 sætum samkvæmt útreikningum Túrista og sætanýtingin í ferðum Icelandair og British Airways var því 66 prósent.
Í dag eykst svo framboð á flugi milli Íslands og London því Easyjet er að taka upp þráðinn í ferðum sínum hingað frá Gatwick flugvelli. Í byrjun desember áformar Wizz Air að hefja áætlunarflug á ný hingað frá Luton.
