Nú þegar flugsamgöngur eru að verða eðlilegar á ný þá þurfa stjórnendur flugfélaga að takast á við nýja áskorun og það er hið ört hækkandi olíuverð. Kaup á þotueldsneyti vega nefnilega mjög þungt í rekstri flugfélaga. Hlutfallið getur hæglega verið á bilinu 20 til 25 prósent þegar olíuverðið er jafn hátt og það er í dag.
Tonn af þotueldsneyti kostar þessa dagana um 760 dollara og til marks um hækkanir síðustu vikna þá var verðið um fimmtungi lægra þegar hlutafjárútboð Play fór fram um miðjan júní.
Í kynningargöngum útboðsins var tekið fram að viðskiptaáætlun flugfélagsins tæki mið af hærra olíuverði en núverandi markaðsverði. Var því horft til þess að tonn af þotueldsneyti gæti farið upp í 660 dollara. Verðið í dag er fimmtán prósentum hærra. Til viðbótar hefur krónan veikst um 7 prósent gagnvart dollara á þessum tíma.
Munurinn er ennþá meiri þegar horft er til þeirrar spár sem sérfræðingar Icelandair kynntu í tengslum við hlutafjárútboð félagsins fyrir ári síðan. Þar var gert ráð fyrir að meðalverðið í ár yrði um 400 dollarar á tonn. Spáin sem nær til ársins 2024 og þar er meðalverðið innan við 500 dollarar á tonn allt tímabilið.
Sem fyrr segir þá er stór hluti af kostnaði flugfélaga bundinn kaupum á eldsneyti. En til að draga úr sveiflum í rekstrinum þá hefur það tíðkast hjá fjölda flugfélaga að gera samninga um kaup á eldsneyti á ákveðnu verði fram í tímann. Þannig er komið í veg fyrir að umtalsverðar verðhækkanir á olíu hafi mikil áhrif á reksturinn með stuttum fyrirvara. Wow Air var aldrei með svona varnir en Icelandair hefur hins vegar lengi haft þann háttinn á að kaupa alla vega helmingin af notkuninni langt fram í tímann.
Hluti af fjárhagslegri endurskipulagningu flugfélagsins í fyrra var að breyta þessum samningum.
Talsmenn félagsins segjast þó ekki geta rætt hvernig innkaupunum er háttað í dag né hversu mikil áhrif verðshækkanirnar hafa haft á afkomu félagsins. Skýringin er sú að félagið er í þagnabindindi fram í næstu viku þegar uppgjör félagsins, fyrir þriðja fjórðungi ársins, verður kynnt.
Hjá Play fást þau svör að ekki sé hægt að veita upplýsingar um áhrif verðhækkana á rekstur félagsins né heldur hversu þungt kaup á eldsneyti vega í rekstri Play eða hvernig innkaupum á eldsneyti er háttað.