Það er yfirlýst markmið stjórnenda norska flugfélagsins Norwegian að umsvifin verði ekki aftur jafn mikil og þau voru fyrir heimsfaraldur. Félagið hefur nefnilega hætt öllu áætlunarflugi til Norður-Ameríku og lokað fjölda starfsstöðva í Evrópu. Engu að síður nýttu sexfalt fleiri sér ferðir norska félags en Icelandair í síðasta mánuði.
Í samanburði við október árið 2019 var farþegahópur hjá Norwegian hins vegar rétt um fjörutíu prósent af því sem var. Icelandair er aftur á móti búið að ná ríflega helmingi af sínum farþegum tilbaka. Það er meira en hin norrænu alþjóðlegu flugfélögin geta státað af.
Í síðasta mánuði voru umsvif SAS til að mynda 47 prósent af því sem var á sama tíma í hittifyrra.
Niðursveiflan er mest hjá Finnair enda snýr stærsti hluti starfsemi þess félags að flugi til Asíu. Fólksflutningar milli Asíu og Evrópu er aftur á móti ennþá mjög takmarkaðir og þannig reikna stjórnendur finnska félagsins ekki með að kínverski markaðurinn taki við sér fyrr en á seinni helmingi næsta árs.