Tuttugu stærstu hluthafarnir í Icelandair Group eiga samanlagt um helming af öllu hlutafé í samsteypunni. Hjá Play fara þeir tuttugu stærstu með ennþá stærri hlut eða um tvo þriðju.
Og það eina sem þessir tveir topplistar eiga sameiginlegt í dag er að þar eru að finna Birtu lífeyrissjóð og hlutabréfasjóðinn Innlend hlutabréf sem er á vegum Stefnis.
Enginn af hinum átján stærstu hjá Icelandair er á lista Play eða öfugt, alla vega eins og staðan er samkvæmt nýjustu listum félaganna tveggja.
Bankarnir Arion og Kvika komast reyndar blað hjá báðum félögum en þar eru líklegast hlutabréf sem eru að langmestu leyti í eigu viðskiptavina bankanna tveggja.
Vægi Birtu í hluthafahópunum tveimur er mjög mismunandi. Lífeyrissjóðurinn á nefnilega nærri níu prósent hlut í Play en rétt um eitt prósent í Icelandair en Birta tók ekki þátt í hlutafjárútboði síðarnefnda flugfélagsins haustið 2020. Virði hlutar sjóðins í Play er í dag um 1,5 milljarður króna á meðan eitt prósent í Icelandair er um 640 milljón kr. virði.
Bréfin sem hlutabréfasjóður Stefnis á í Play eru virði um 230 milljóna kr. og nemur hlutinn 1,35 prósenti á meðan 0,85 prósent hlutur sjóðsins í Icelandair er ríflega tvöfalt verðmætari.