Þeir erlendu ferðamenn sem dvöldu á Íslandi í október eyddu að jafnaði um 37 þúsund krónum meira en sá hópur sem var hér í október 2019. Þessi viðbót skilar sér til hótela, bílaleiga, veitingahúsa og verslana.
Á hinn bóginn hefur kortavelta á hvern ferðamann í flokknum „Ýmis ferðaþjónusta“ dregist saman. Í þennan flokk fara m.a. kortagreiðslur til ferðaskrifstofa, ferðaskipuleggjenda og markaðssetningarfyrirtækja samkvæmt upplýsingum frá Rannsóknarsetri verslunarinnar.
Í október lækkaði meðalvelta á hvern ferðamann í þessum flokki um fjögur þúsund krónur. Fór úr 17 þúsund kr. í október 2019 niður í 13 þúsund kr. Hlutfallslega nemur lækkunin 23 prósentum eins og sjá má hér fyrir neðan.
Þróunin var líka neikvæð í september þegar meðalútgjöldin í þessum flokki fóru niður um 16 prósent en í ágúst var niðursveiflan helmingi minni eða 8 prósent. Í júní og júlí jókst hins vegar erlenda kortalvelta í þessum flokki eins og öðrum.
Þetta sýnir samanburður Túrista sem byggir á gögnum frá Rannsóknarsetri verslunarinnar og talningu Ferðamálastofu erlendum brottfararfarþegum á Keflavíkurflugvelli. Eins og gefur að skilja eru skekkjur í þessum tölum eins og öðrum sambærilegum gögnum.
Þegar horft er til tímabilsins júlí til október þá sést að „Ýmis ferðaþjónustu“ fær núna minna hlutfall af erlendu kortaveltunni en áður.
Skýringar á þessum breytingum gætu, samkvæmt viðmælendum Túrista, legið í mörgum þáttum. Til að mynda fækkun erlendra skemmtiferðaskipa í ágúst og september, fjölmennu rafíþróttamóti í Reykjavík í haust og umfangsmikilli söluherferð Icelandair á tilboðssíðunni Travelzoo í Bandaríkjunum. Þar bauðst bandarískum ferðamönnum meðal annars að bóka afþreytingu hér á landi með flugmiðunum.