Gengi hlutabréfa í norrænum flugfélögum lækkaði í öllum tilvikum nema einu í síðustu viku. Markaðsvirði Icelandair hækkaði nefnilega um nærri tvö prósent.
Aftur á móti var vikan hrikaleg fyrir þá sem eiga hlutabréf í hinu norska Flyr. Vikan byrjaði nefnilega á tilkynningu um að félagið þyrfti á meira fé að halda. Í kjölfarið féllu bréfin hratt og greinendur fóru hörðum orðum um félagið.
Sérfræðingar DnB bankans sögðust til að mynda ekki skilja afhverju nokkur ætti að setja fé í svona vonlaust verkefni. Og fyrrum framkvæmdastjóri hjá SAS sagði að Flyr væri einfaldlega of líkt SAS og Norwegian og hefði enga sérstöðu. Það vann því lítið með stjórnendum norska lággjaldaflugfélagsins í vikunni en þeir vonast samt til að afla aukins hlutafjár í útboði strax eftir áramót.