Play tók í gær við splunkunýrri Airbus A320neo þotu en félagið hefur leigt tvær slíkar fyrir næsta sumar. Hægt er að koma fyrir að hámarki 194 sætum í þessa tegund farþegaþota samkvæmt flugvélaframleiðandanum en til samanburðar eru sæti fyrir 192 farþega í þeim þremur Airbus A321neo þotum sem félagið notar í dag. Til stendur að fjölga sætaröðunum í þeim.
Það bíður þó betri tíma að tilkynna hversu vel Play mun nýta plássið um borð í þotunum því að sögn Nadine Guðrún Yaghi, samskiptastjóri flugfélagsins, verður útlit vélanna og sætafjöldi kynntur á næstunni. Hún segir að nú sé verið að gera minniháttar breytingar á farþegarými nýju þotunnar og mála hana í litum Play. Sú vinna tekur um einn mánuð.
Að þeim tíma loknum fer flugvélin í einskonar geymslu þangað til hún bætist við flota Play í vor þegar félagið hefur áætlunarflug til nýrra áfangastaða í Evrópu og Norður-Ameríku.
Floti Play mun samanstanda af sex Airbus flugvélum næsta sumar en félagið hefur ennþá ekki kynnt leigusamning á þeirri sjöttu. Það sama má segja um þær þrjár Boeing Max þotur sem Icelandair hyggst leigja fyrir næsta sumar. Félagið hefur ekki upplýst um að samningar á leigu á þeirri viðbót liggi fyrir.