Í lok næstu viku er komið að jómfrúarferð Play til Amsterdam í Hollandi en þangað munu þotur félagsins fljúga tvisvar í viku í vetur auk sex viðbótarferða í kringum jól og áramót. Aftur á móti verða brottfarirnar til tveggja annarra áfangastaða færri en verið hefur hingað til.
Play hefur nefnilega tekið úr sölu níu ferðir til London frá miðjum janúar og fram í miðjan febrúar. Á þessu sama tímabili hefur brottförunum til Berlínar verið fækkað um sjö. Nadine Guðrún Yaghi, samskiptastjóri Play, segir í svari við fyrirspurn Túrista að fyrir Covid-19 hafi janúar ekki verið þekktur fyrir mikla eftirspurn. Þar af leiðandi hafi verið tekin ákvörðun um að aðlaga framboðið á þessu tímabili.
Fjölgun ferða til Amsterdam hefur verið í sölu síðan í byrjun október og skrifast viðbótin á þá staðreynd að Play fékk fleiri lendingarleyfi á Schiphol.
Í heildina þá gerir flugáætlun Play í janúar ráð fyrir 160 ferðum til og frá Keflavíkurflugvelli. Það eru nærri fimmtungi færri ferðir en voru á boðstólum nú í október. Þann mánuð flutti félagið um 25 þúsund farþega og sætanýting var 67 prósent sem var mun betri árangur en náðst hafði mánuðina á undan.
Amsterdam er ekki eini áfangastaðurinn sem Play bætir við leiðakerfi sitt í desember því þá hefur flugfélagið líka áætlunarflug til Las Palmas á Kanarí, nánar tiltekið þann 22. desember.
Viðbót: Skýringum frá samskiptastjóra Play var bætt við fréttina þegar þær bárust.