Arion banki seldi nýverið meirihluta sinn í dönsku ferðaskrifstofunni Bravo Tours. Sú var áður hluti af Primera Travel samsteypunni sem Andri Már Ingólfsson átti en bankinn tók yfir í hittifyrra. Meðal nýju eigendanna er Daninn Peder Hornshøj sem stofnaði Bravo Tours árið 1998 og stýrði henni öll þau ár sem hún var í eigu Andra Más og síðar Arion banka.
„Ég hef ekkert nema gott að segja um samstarfið við Íslendingana. Það hefur verið ánægjulegt í gegnum öll þessi ár. Hugarfar okkar er jú næstum því það sama,“ segir Hornshøj þegar Túristi spyr hann út í samstarfið við Íslendingana.
Daninn bætir því við að hann geti ekki annað en hrósað starfsmönnum Arion banka sem tóku við eignarhaldinu sumarið 2019.
„Þetta hefur verið frábær samvinna sem hefur einkennst af trausti og virðingu frá báðum hliðum með það að markmiði að gera það besta sem hægt er fyrir Bravo Tours.“
Auk þess að veita Bravo Tours forstöðu þá leiddi Hornshøj eignarhaldsfélagið Travelco Nordic en það félag hélt utan um ferðaskrifstofur Primera Travel Group á hinum Norðurlöndunum. Þar á meðal Heimsferðir á Íslandi og Hornshøj fékk því innsýn inn í íslenskan ferðaskrifstofurekstur.
Sérðu tækifæri fyrir Bravo Tours á íslenska markaðnum?
„Bravo Tours er ekki með nein áform um að koma sér fyrir á Íslandi. Við eigum í góðu samstarfi við okkar gamla systurfélag, Heimsferðir. Við miðlum af og til af reynslu okkar í báðar áttir og erum ennþá með marga sameiginlega samstarfsfélaga á áfangastöðunum. Við erum á engan hátt í samkeppni og það er gott að geta hjálpast að,“ segir Hornshøj.
Spurður um muninn á því að reka ferðaskrifstofu á Íslandi og Danmörku þá bendir Hornshøj á hversu fámennið hér á landi getur flækt reksturinn.
„Mér þykir það aðdáunarvert hvernig Heimsferðir ná að lesa í íslenska markaðinn. Það er nefnilega stór munur á því að selja ferðir til 5,7 milljóna Dana eða 370 þúsund Íslendinga. Tómas Gestsson og hans fólk hjá Heimsferðum er mjög fært í því að aðlaga sig að markaðnum með því sýna sveigjanleika. Það krefst þess að þau séu miklu meira með smáatriðin á hreinu en við í Danmörku. Hjá Bravo Tours setjum við í sölu fimm ferðir í viku til Costa del Sol yfir 26 til 27 vikna tímabil og svo gerum við ekki svo miklar breytingar. Á Íslandi þarf næstum að handstýra hverri einustu brottför og laga sig að markaðnum viku fyrir viku. Í þessu eru þau ótrúlega fær hjá Heimsferðum,“ útskýrir sá danski að lokum.