Flugáætlun Play eftir áramót er ekki eins umsvifamikil og lagt var upp með líkt og Túristi greindi frá í gær. Skýringin á því er sú að framboðið hefur hefur verið lagað að minni eftirspurn. Bogi Nils Bogason, forstjóri Icelandair, segir að þar stefni í að flugáætlunin á fyrsta fjórðungi næsta árs verði um 70 prósent af því sem var á sama tíma árið 2019.
„Eins og er erum við bara að sjá stöðuna þróast jákvætt,“ segir Bogi aðspurður hvort félagið ætli, líkt og Play, að draga úr framboði eftir áramót. „Eftir sem áður munum við aðlaga okkur að síbreytilegum markaðsaðstæðum ef þörf er á – bæði upp á við og niður á við. En ekkert fyrirséð eins og er,“ bætir Bogi við.
Niðurskurðurinn hjá Play eftir áramót kemur eingöngu niður á flugi til Berlínar og London. Þotur félagsins munu því aðeins fljúga tveir ferðir í viku, í stað fjögurra, til borganna tveggja frá miðjum janúar og fram í febrúar.
Icelandair er eina flugfélagið sem keppir við Play í flugi milli Íslands og Berlínar. Samdrátturinn hjá því síðarnefnda gæti því komið Icelandair til góða. Sérstaklega á þessum árstíma þegar færri eru á ferðinni.
Fyrir farþega á leið milli London og Íslands þá eru valkostirnir fleiri því British Airways, Easyjet og Wizz Air bjóða öll upp á Íslandsflug frá flugvöllum í nágrenni við bresku höfuðborginni í samkeppni við íslensku félögin tvö.
