Á meðan Icelandair og Play halda úti ferðum héðan til Charles de Gaulle flugvallar í París þá fljúga þotur Transavia hingað frá Orly flugvelli sem er aðeins nær frönsku höfuðborginni.
Þetta fransk-hollenska lágfargjaldaflugfélag hefur lengi flogið til Keflavíkurflugvallar og yfir sumarmánuðina hafa ferðirnar í mesta lagi verið fjórar í viku. Næsta sumar stefnir Transavia aftur á móti á daglegt Íslandsflug frá Orly í París.
Skýringin á tíðari ferðum er opnun landamæra og aukin eftirspurn eftir ferðalögum til áfangastaða þar sem fjöldi ferðamanna er takmarkaðri segir talskona Transavia í svari til Túrista.
Með þessum daglegu ferðum Transavia þá mun framboð á Íslandsflugi frá París næsta sumar aukast frá því sem var. Play gerir þó áfram ráð fyrir fjórðum ferðum í viku á meðan Icelandair mun fljúga sínum þotum til Parísar allt að þrisvar á dag líkt og sumarið 2019.