Tekjur Radisson 1919 hótelsins námu að jafnaði um 28.300 krónum á hvert herbergi í júlí, ágúst og september árið 2019. Kostnaðurinn var um 11 þúsund kr. lægri.
Á þessu sama tímabili í ár voru tekjur á hvert herbergi hótelsins 25.200 kr. sem er lækkun um ríflega tíund eða 3.100 kr. frá því sem var sumarið fyrir Covid-19 faraldurinn. Rekstrarkostnaðurinn hefur hins vegar lækkað hlutfallslega ennþá meira því hann fór úr 17.200 krónum á hvert herbergi og niður í 11.700 kr. Lækkunin nemur nærri þriðjungi.
Afkoman af rekstri hótelsins var því jákvæð um 109 milljónir króna á þriðja fjórðungi ársins í ár sem er bæting um 19 milljónir frá sama tíma í hittifyrra.
Þetta er meðal þess sem lesa má út úr uppgjörum Eikar sem á hótelið við Hafnarstræti. Og þar sem fasteignafélagið er skráð á markað þá fæst góð innsýn inn í rekstur miðbæjarhótels í uppgjörum fyrirtækisins. Það ber þó að hafa má í huga að tekjur hótelsins koma ekki aðeins vegna útleigu á herbergjum því byggingunni er einnig veitingarekstur.
Stjórnendur Eikar segja í svari til Túrista að þeir geti ekki veitt nánari upplýsingar um stöðu hótelsins umfram það sem fram kemur í uppgjörum. Skýringin á því er sú að Eik er skráð í Kauphöllina sem fyrr segir.
Í uppgjöri Eikar fyrir fyrstu níu mánuði ársins 2019 kemur þó fram að framkvæmdir á herbergjum hótelsins hafi haft neikvæð áhrif á afkomuna. Það kann að skýra afhverju kostnaðurinn á þriðja fjórðungi þessa árs er um þriðjungi lægri en á sama tíma árið 2019. En sem fyrr segir þá telja stjórnendur Eikar sig ekki mega skýra stöðuna nánar vegna reglna kauphallarinnar.
Fyrstu níu mánuði ársins voru rekstrartekjur Radisson 1919 282 milljónir króna sem er rétt rúmlega helmingur af því sem var á sama tímabili í hittifyrra. Afkoman var þó jákvæð um rúmlega eitt hundrað milljónir.
