Heimsfaraldurinn hefur valdið fluggeiranum ómældu tjóni en engu að síður hefur fjöldi nýrra flugfélaga hafið rekstur í ár. Í Noregi fór hið norska Flyr í loftið í lok júní og fljúga þotur félagsins í dag bæði milli norskra borga og eins frá Ósló til vinsælla ferðamannastaða í Evrópu. Félagið er skráð á hlutabréfamarkað og birti í morgun uppgjör fyrir þriðja fjórðung ársins.
Niðurstaðan er tap upp á 162 milljónir norskra króna en það jafngildir um 2,5 milljörðum króna. Hjá Play nam tapið um 1,4 milljarði króna á þriðja ársfjórðungi en það félag fór líka í loftið í júní og með álíka margar þotur.
Í tengslum við útgáfa uppgjörsins gáfu stjórnendur Flyr það svo út að þeir þyrftu á meira fé að halda til að koma félaginu í gegnum næstu misseri. Ætlunin er að óska eftir 3,8 milljörðum kr. (250 milljónir norskra króna) hjá núverandi hluthöfum. Í lok september nam lausafjárstaða Flyr 5,5 milljörðum króna (363 millj. norskar kr.). Til samanburðar var um tíu milljarðar kr. hjá Play.
Tonje Wikstrøm Frislid, forstjóri Flyr, segir í viðtali við Dagens Næringsliv nú í morgun að þörfin fyrir aukið fé skrifist að hluta til á neikvæð áhrif Delta-afbrigðis kórónaveirunnar á reksturinn. Hún bætir því við að bætt fjárhagsstaða geri félaginu líka kleift að stækka flugflotann en nýverið gerði Flyr samkomulag um leigu á allt að tíu Boeing Max þotum.
Í því samhengi má rifja upp að stjórnendur Icelandair vinna nú að því að leigja þrjár slíkar fyrir næsta sumar.
Gengi hlutabréfa í Flyr var í lok síðustu viku 3,85 norskar kr. á hvern hlut eða 23 prósentum lægra en það var í útboði félagsins fyrr á árinu. Eftir birtingu uppgjörsins í morgun og tilkynningu um hlutafjárútboð þá hefur gengið lækkað um 13 prósent.
