Spænska borgin Alicante bætist við leiðakerfi Icelandair á næsta ári en hingað til hafa þotur félagsins flogið þangað á vegum systurfélagsins Vita. Farmiðar til Alicante hafa því ekki verið til sölu á heimasíðu flugfélagsins heldur eingöngu hjá ferðaskrifstofunni. Á þessu verður brátt breyting á líkt og Túristi greindi frá fyrr í dag.
Með þessari uppstokkun mun Vita einbeita sér að sölu pakkaferða og sú starfsemi efld og samþætt pakkaferðum Icelandair. Enda er mikil eftirspurn eftir þess háttar þjónustu að sögn Boga Nils Bogasonar, forstjóra Icelandair Group.
„Vita hefur tryggan viðskiptavinahóp á íslenska markaðnum og hefur starfsfólkið unnið frábært starf við uppbyggingu vörumerkisins. Þegar Icelandair bætist við þá verður salan og dreifingin enn öflugri en áður. Við erum að einfalda og straumlínulaga rekstur Icelandair með þessu og styrkja tekjuöflun félagsins,” útskýrir Bogi.
Hann segir að stærsti hluti starfsemi Vita verði fluttur út skrifstofum ferðaskrifstofunnar í Skógarhlíð og yfir til Icelandair á næsta ári. Ekki kemur til uppsagna starfsfólks vegna þessara breytinga.
Bogi bendir jafnframt á að rekstur Vita og Icelandair hafi lengi verið mjög tengdur og því sé þetta í raun ekki mikil breyting. Þannig hafi til að mynda sölu- og markaðsmál ferðaskrifstofunnar verið á könnu Icelandair um töluvert skeið.
Það sem þó breytist er að hægt verður að bóka pakkaferðir á spænska áfangastaði á heimsíðu Icelandair, til dæmis flug og hótel á Mallorca. Það munu nefnilega fleiri sólaráfangastaðir en Alicante sem bætast við leiðakerfi Icelandair á fyrri hluta næsta árs.
Sumaráætlun Vita á næsta ári gerir meðal annars ráð fyrir reglulegum ferðum til Krítar og Mallorca.