Ein umsvifamesta flugfélagasamsteypa Evrópu er Air France-KLM Group sem kennd er við stærstu flugfélög Frakklands og Hollands. Stjórnendur félaganna tveggja hafa lengi kosið að halda sig fjarri íslenska markaðnum en aftur á móti hefur lágfargjaldaflugfélagið Transavia, sem eru í eigu frönsk-hollensku samsteypunnar, verið að bæta í Íslandsflugið jafnt og þétt.
Næsta sumar eru til að mynda á dagskrá daglegar ferðir hingað frá Orly flugvelli við París og tíðar ferðir frá Schiphol í Amsterdam.
Nú hefur Transavia jafnframt sett í sölu vikulegar brottfarir frá Nantes í Frakklandi til Keflavíkurflugvallar.
Félagið hélt út flugi á þessari leið í júlí og ágúst árið 2020 en næsta sumar er ætlunin að hefja vertíðina strax í lok maí og halda henni úti fram í lok október.
Samtals verða ferðirnar hingað frá Nantes tuttugu og þrjár talsins og því sæti fyrir nærri 4.400 farþega. En sem fyrr segir verður aðeins flogið einu sinni í viku og því má gera ráð fyrir að dvalartími ferðamannanna frá Nantes verði langur.
Það má því gera ráð fyrir að Frakkarnir frá Nantes muni standa undir að lágmarki tuttugu þúsund gistinóttum hér á landi frá júní til október á næsta ári.
Til samanburðar voru gistinætur Frakka hér á landi á þessu sama tímabili í ár nærri 55 þúsund talsins.