Ekkert þýskt flugfélag heldur úti áætlunarferðum milli Íslands og Berlínar en aftur á móti fljúga þotur Icelandair og Play reglulega til borgarinnar.
Í júlí, ágúst og september buðu félögin tvö upp á samtals 135 ferðir til þýsku höfuðborgarinnar sem var aukning um 15 ferðir frá sama tímabili í hittifyrra. Hlutfallslega jókst framboðið um 13 prósent. Sú viðbót endurspeglast þó ekki í gistináttatölum frá Berlín.
Þar í borg fækkaði nefnilega íslenskum hótelgestum um 51 prósent á þessum þriðja fjórðungi ársins miðað við sama tíma árið 2019. Íslensku gestirnar voru rétt rúmlega sextán hundruð talsins þessa þrjá mánuði.
Íslendingar sem eiga bókaða hótelgistingu í Berlín voru reyndar lítill hluti af öllum þeim farþegum sem flugu milli Íslands og Berlínar í júlí, ágúst og september. Því miðað við fjölda flugfarþega á flugleiðinni þá lætur nærri að rétt um níundi hver farþegi í þotunum hafi verið Íslendingur sem gisti á hóteli í Berlín.
Þetta hlutfall hefur talsvert hærra í hittifyrra og því spurning hvenær Icelandair og Play fá Íslendinga til að fjölmenna í borgarferðir til Berlínar á nýjan leik.