Spurður um viðbrögð við áframhaldandi niðurfellingu gistináttagjaldsins þá segir Kristófer Oliversson, forstjóri Centerhótela og formaður Fyrirtækja í hótelrekstri og gistiþjónustu (FHG), að hótelrekendur gleðjist yfir þessum skilaboðum.
„Þau sýna skilning ríkisstjórnarinnar á aðstæðum okkar enda er snjóhengjan ennþá óleyst og við erum enn í miðjum faraldri,“ bætir Kristófer við. Vísar hann þar til þess mörg ferðaþjónustufyrirtæki hafa síðustu misseri fengið frest á geriðslu opinberra gjalda og afborganum vegna þess hve illa heimsfaraldurinn hefur leikið atvinnugreinina.
Skynsamlegast að afleggja varanlega
Sem fyrr segir þá er endurskoðun á gistináttagjaldinu nefnd í nýjum stjórnarsáttmála. Þó með þeim hætti að sveitarfélög njóti góðs af gjaldtökunni eins og það er orðað. Samtök ferðaþjónustunnar hafa hins vegar talað fyrir afnámi skattsins.
„Gistináttaskatturinn var alvarlega gallaður skattur á margan hátt í þeirri mynd sem hann var, m.a. vegna þess hve skakka samkeppnisstöðu hann skapar. Það er augljóst að staða ferðaþjónustunnar í heimsfaraldrinum leyfir ekki aukna skattlagningu,“ segir Jóhannes Þór Skúlason, framkvæmdastjóri SAF.
Hann ítrekar afstöðu samtakanna um að skynsamlegast væri að afleggja gistináttaskattinn varanlega því aukin skattlagning hamli vexti greinarinnar, sérstaklega núna þegar viðspyrnuskeið er framundan.
Ekki allir gistikostir skattlagðir
Á það hefur verið bent að gistináttaskattur sé ólíklega innheimtur með reglulegum hætti í heimagistingu og annarri óskráðri gistingu. Gott dæmi um það er sú staðreynd að Airbnb rukkar ekki þess háttar gjöld hér á landi öfugt við það sem fyrirtækið gerir í Frakklandi.
„Það sjá það allir sem vilja að það gengur ekki að búa til nýja skatta á hótelstarfsemi á meðan ýmis önnur gistiþjónusta er meira og minna undanþegin öllum sköttum og skyldum. Ef það þarf að leggja sérstakan skatt á ferðaþjónustu þá verður það vera með annars konar gjaldtöku sem hefur ekki áhrif á samkeppni íslenskrar gistiþjónustu við erlenda keppinauta. Á undanförnum árum höfum við byggt upp mjög glæsilega hótelstarfsemi á Íslandi. Við treystum okkur til að keppa við hvern sem er svo fremi sem það er heilbrigðum forsendum,“ bætir Kristófer við að lokum.