Það voru ekki miklar árstíðasveiflur í komum Breta til Íslands þegar breska lágfargjaldaflugfélagið Easyjet hóf áætlunarflug til Íslands í mars 2012. Ásókn Breta í vetrarferðir til Íslands jókst svo stórlega í framhaldinu og hingað komu orðið fleiri breskir ferðamenn í febrúar en samanlagt yfir sumarmánuðina þrjá. Yfir vetrarmánuðina lét þá nærri að fjórði hver ferðamaður hér á landi væri með breskt vegabréf.
Umsvif Easyjet á Keflavíkurflugvelli voru þó farin að dragast saman áður en Covid-19 setti allt úr skorðum. Þannig flugu þotur félagins hingað til 115 sinnum frá London í janúar 2018 en árið eftir voru ferðirnar 101 samkvæmt ferðagögnum Túrista.
Fyrir næstkomandi janúar höfðu stjórnendur Easyjet tekið frá 65 lendingartíma á Keflavíkurflugvelli en nú hefur ferðunum verið fækkað niður í fjörutíu. Skýringin á þessum samdrætti liggur aðallega í mikilli fækkun ferða frá annarri viku janúar og fram í febrúar. Þá er aðeins gert rá fyrir þremur flugferðum í viku til Íslands frá Gatwick flugvelli og fjórum í viku frá Luton.
Til viðbótar við flug frá Lundúnarflugvöllunum tveimur þá gerir Easyjet ráð fyrir Íslandsflugi frá Birstol, Edinborg og Manchester í janúar. Samtals verða brottfarirnar fjörtutíu og ein og þar með stefnir í að þotur Easyjet lendi áttatíu og einu sinni á Keflavíkurflugvelli í janúar. Til samanburðar flaug félagið 196 sinnum hingað til lands frá Bretlandi í janúar 2018.