Það voru 250 þúsund farþegar sem áttu leið um Flugstöð Leifs Eiríkssonar í síðasta mánuði sem er nærri fjórðungi færri en í október. Á flugvöllunum í Kaupmannahöfn, Ósló, Stokkhólmi og Helsinki var þróunin önnur.
Þar fjölgaði farþegnum nefnilega frá mánuðinum á undan.
Þetta er annan mánuðinn í röð þar sem þróun á Keflavíkurflugvelli er neikvæð á meðan farþegahópurinn á hinum flugvöllunum stækkar. Hafa ber í huga að innanlandsflug er stór hluti af starfsemi hinna flugvallanna á meðan starfsemi Keflavíkurflugvallar einskorðast við millilandaflug.
Þegar horft er til fjölda farþega í nóvember 2019 kemur í ljós að Helsinki á lengst í land með að ná fyrri stöðu og þar á eftir kemur Keflavíkurflugvöllur. Aftur á móti er batinn mestur í Ósló því þar voru afköstin í flugstöðinni um tveir þriðju af því sem var í nóvember í hittifyrra þegar Covid-19 var ennþá óþekkt fyrirbæri.