Þegar mest lét var hægt að fljúga beint frá Keflavíkurflugvelli til tólf þýskra borga en síðastliðið sumar voru þýsku áfangastaðirnir aðeins fimm talsins. Stuttgart bætist við í byrjun næsta sumars þegar Play hefur áætlunarflug þangað en það verður ekki eina breytingin.
Því í ágúst verða í boði ferðir héðan til Lubeck í norðurhluta Þýskalands. Þessar ferðir eru á vegum Lubeck Air sem er í eigu flugmálayfirvalda í borginni. Í flugið verða nýttar hundrað sæta þotur og þetta er því lítil viðbót við heildarframboðið á ferðum milli Íslands og Þýskalands en engu að síður nýjung.
Farþegar sem hefja ferðalagið á Íslandi geta komist til Lubeck og heim aftur fyrir 240 evrur sem jafngildir 35.500 krónum. Farangur innifalinn í fargjaldinu hjá Lubeck Air.
Til viðbótar við þetta nýja flug til Lubeck þá verður hægt að fljúga frá Keflavíkurflugvelli til Frankfurt, Hamborg, Dusseldorf, Stuttgart, Munchen og Berlínar næsta sumar.
