Nú telst Norse Atlantic vera fullgilt flugfélag því norsk flugmálayfirvöld veittu þessu nýja lágfargjaldaflugfélagi flugrekstrarleyfi í gær. Nú bíða forsvarsmenn félagsins eftir sambærilegu leyfi frá Bretlandi og heimild fyrir áætlunarflugi frá bandarískum yfirvöldum.
Þegar þetta tvennt er í höfn stefna forsvarsmanna Norse Atlantic á að hefja sölu á áætlunarflugi frá bæði London og Ósló til Bandaríkjanna. Til að byrja með setur félagið stefnuna á minni flugvelli í nágrenni við New York og Los Angeles en einnig til Fort Lauderdale í Flórída.
Upphaflega var ætlunin að gera út frá Gatwick flugvelli í London en nú lítur út fyrir að félagið fái ekki heppilega afgreiðslutíma þar á bæ. Því mun Norse Atlantic að öllu óbreyttu fljúga til og frá Stansted flugvelli líkt og Play.
Norse hefur tryggt sér fimmtán Boeing Dreamliner þotur sem áður tilheyrðu Norwegian. Bjørn Tore Larsen, forstjóri og stofnandi Norse, fullyrt í vikunni að félagið hefði tryggt sér einstök kjör á þessum þotum. Flugvélaleigur bjóða einfaldlega ekki eins hagstæð kjör í dag og þær gerðu fyrr á árinu sagði Larsen. Vísaði hann meðal annars til þess að félagið greiðir allt næsta ár eingöngu fyrir þann tíma sem vélarnar eru í notkun, svokallað „power by the hour“ samkomulag.
Hvort þess háttar samningar bjóðist líka Icelandair og Play í dag ætti að koma í ljóst þegar félögin tvö kynna fyrir hluthöfum leigusamninga á nýjum þotum. Stjórnendur Icelandair hafa nefnilega síðustu mánuði leitað að tveimur til þremur Max þotum og Play vantar ennþá eina þotu fyrir næsta sumar.
