Það voru nærri 2,2 milljónir farþega sem áttu leið um Keflavíkurflugvöll í fyrra en heimsfaraldurinn setti sterkan svip á árið og sérstaklega fyrri helminginn. Árið á undan einkenndist einnig af þessu ástandi en þá voru farþegarnir tæplega 1,4 milljónir.
Framförin á nýliðnu ári var því töluverð en þegar borið er saman við árið 2019 þá nemur samdrátturinn sjötíu prósentum. Í samanburði við metárið 2018 var niðursveiflan 78 prósent.
Eins og sjá má á línuritinu þá var umferðin um Keflavíkurflugvöll sáralítil fyrstu mánuðina í fyrra en komst á skrið yfir hásumarið. Síðan þá hefur farþegahópurinn dregist saman milli mánaða nema í nýliðnum desember þegar aukning varð miðað við nóvember.