Um 120 þúsund manns greiða árlega um 340 þúsund krónur fyrir greiðan aðgang að kúbbhúsum og hótelum Soho House víðs vegar um heiminn. Ennþá er fyrirtækið ekki með starfsemi á Norðurlöndunum en á því verður breyting í ár.
Soho House hefur nefnilega tekið á leigu á þekkta byggingu stutt frá Nýhöfn í Kaupmannahöfn. Húsnæðið var upphaflega einskonar samgöngumiðstöð fyrir bátasiglingar milli Malmö og Kaupmannahafnar en eftir að Eyrarsundsbrúin var opnuð þá hefur byggingin hýst nokkra matsölustaði.
Næstur í röðinni verður klúbbur að hætti Soho House en forsvarsmenn fyrirtækisins vilja litlar upplýsingar veita um áform sín samkvæmt frétt danska ferðavefsins Standby. Húsnæðið þykir þó ekki nógu stórt til að hýsa gististarfsemi samkvæmt viðmælendum Standby sem vel þekkja til.
Það leikur líka vafi á hvað Soho House ætlar sér að gera með gamla kirkju í nágrenni við matarmarkaðinn á Östermalm en hana tók fyrirtækið á leigu nýverið samkvæmt frétt Svenska dagbladet. Þar gæti þó verið rými fyrir hótelrekstur og það yrði þá fyrsta hótel Soho House á Norðurlöndunum.
Soho House var stofnað í London árið 1995 og rekur í dag 28 klúbbhús og hótel í tíu löndum. Fyrirtækið efndi til hlutafjárútboðs nýverið en rekstur þess gengur ekki sérstaklega vel nú á tímum farsóttar. Á fyrsta fjórðungi síðasta árs tapaði fyrirtækið um 12 milljörðum króna.