Verð á olíu hefur hækkað hratt að undanförnu og hefur ekki verið hærra síðan árið 2014. Á þeim tíma var eldsneytisálagið hjá Icelandair tvöfalt hærra en það er í dag.
Þá nam álagið 16.400 krónum ef flogið var héðan til Bandaríkjanna og 9.200 ef ferðinni var heitið til annarra Evrópuríkja. Eldsneytisgjaldið í dag er 8.100 krónur ef flogið er vestur um haf en annars 4.600 kr. Gjaldið á heimleiðinni sveiflast í takt við gengi evru og dollara.
Spurð hvort hækkana sé að vænta á eldsneytisálaginu í ljósi stöðunnar á olíumarkaði þá bendir Ásdís Pétursdóttir, upplýsingafulltrúi flugfélagsins, á að gjaldið sé aðeins hluti af farmiðaverðinu.
„Fargjöldin sem eru í boði hverju sinni eru í stöðugri endurskoðun enda erum í harðri samkeppni á þeim mörkuðum sem við störfum á, eldsneytisgjaldið er einungis hluti þess,“ skrifar Ásdís í svari til Túrista.
Komu hækkuninni ekki út í verðlagið
Eldsneytisgjaldið er því ekki föst upphæð sem ávallt er bætt við fargjöldin en það hefur líka reynst stjórnendum Icelandair erfitt að koma kostnaðarhækkunum út í verðlagið. Árið 2018 var olíuverðið álíka hátt og það er í dag og þá sögðu stjórnendur flugfélagsins að þróun fargjalda væri ekki sjálfbær í ljósi kostnaðarhækkana.
Þegar árið 2018 var svo gert upp þá var niðurstaðan tap upp á nærri sjö milljarða króna. Þrátt fyrir að rekstur flugfélaga ú í heimi hafi almennt verið blómlegur það ár en samkeppnin við Wow Air og Norwegian lék Icelandair grátt.
Ef olíuverðið helst áfram mjög hátt og langt yfir það sem sérfræðingar Icelandair höfðu reiknað með í ár þá er spurning hvort sú þróun muni ekki á einhvern hátt koma fram í fargjöldum Icelandair og annarra flugfélaga. Annað hvort með hærra eldsneytisgjaldi eða öðrum hætti.