Bandarísk landamæri voru opnuð fyrir bólusettum Evrópubúum í byrjun nóvember. Engu að síður voru ferðir Icelandair til Seattle færri þá en mánuðina á undan. Hlutfall óseldra sæta hélst einnig óbreytt þó ferðafrelsið væri meira en áður.
Spurður um skýringar á þessari þróun þá segir Guðni Sigurðsson, upplýsingafulltrúi Icelandair, að fyrir þessu séu tvær meginástæður.
Í fyrsta lagi fylgi eftirspurn eftir flugi til Seattle árstíðarsveiflum og er hún minni frá nóvember og fram í febrúar. Icelandair flýgur engu að síður daglega til borgarinnar á þessum tímabili sem er sama tíðni og verið hefur síðan árið 2017. Í sumar og haust voru ferðirnar fleiri og flestar í ágúst þegar Icelandair bauð upp á 42 brottfarir frá Keflavíkurflugvelli til Seattle.
Önnur ástæða fyrir færri farþegum, í flugi til Seattle, er sú að þrátt fyrir jákvæð áhrif af afléttingu landamæratakmarkanna þann 8. nóvember sl. þá hafi smitum fjölgað í Evrópu stuttu síðar. Það hafði nokkur áhrif eins og í fyrri bylgjum heimsfaraldursins að sögn Guðna.
Tvö af hverjum þremur sætum seld
Það tekur tæpar átta klukkustundir að fljúga til Seattle og þrátt fyrir fjarlægðina þá nýtir Icelandair að mestu Boeing Max þotur í flugið til borgarinnar í dag. Þær þotur taka aðeins færri farþega en gömlu Boeing 757 þoturnar. Sætanýtingin í ferðunum til Seattle í nóvember var þó á pari við það sem var í september segir Guðni án þess þó að upplýsa hver nýtingin var.
En samkvæmt útreikningum Túrista var um þriðjungur sætanna óseldur í ferðum Icelandair til Seattle í nóvember sl. Við þessa útreikninga er stuðst við farþegatölur frá flugmálayfirvöldum í Seattle en hér á landi eru engar sambærilegar upplýsingar opinberar og hefur Túristi árangurslaust að fá því breytt.
Icelandair næst stærst í ár
Í heildina nýttu tæplega 47 þúsund farþegar sér Evrópuflug til og frá Seattle í nóvember. Það er rétt um þrjú prósent viðbót frá því í október. Bandaríska flugfélagið Delta er með stærstu hlutdeildina í Evrópuflugi frá Seattle en þar á eftir kemur Icelandair þegar horft er til tímabilsins júlí til nóvember 2021.