Fimmtungur af rekstrarkostnaði Icelandair árið 2018 skrifaðist á kaup á þotueldsneyti en það ár var olíuverð hærra en það hafði verið í langan tíma. Í dag kostar olían ennþá meira en fyrir fjórum árum síðan og hefur hækkað um tvo þriðju síðustu tólf mánuði. Fat af Norðursjávarolíu kostar núna 90 dollara og það eru teikn á lofti um að verðið haldi áfram að hækka á næstunni.
Þannig spá sérfræðingar Goldman Sachs því að verð á Norðursjávarolíu fari upp í 100 dollara á fatið í ár og skrifast sú hækkun á takmarkað framboð þar sem olíubirgðar er í algjöru lágmarki samkvæmt frétt Bloomberg.
Spennan í samskiptum Rússa við Nato hefur einnig slæm áhrif að mati Nadia Martin Wiggen, sérfræðings Pareto bankans í Noregi. En Norðmenn eru stórtækir í olíuvinnslu á heimsvísu og fylgjast mjög náið með gangi mála á þessum markaði.
Í viðtali við Dagens Næringsliv útskýrir Wiggen að Rússland sé þriðji stærsti olíuframleiðandi í heimi og um þriðjungur af þeirri olíu sem aðrar Evrópuþjóðir flytja inn komi einmitt frá Rússum. Auknar líkur á stríðsrekstri og viðskiptabönnum hafi því neikvæð áhrif á markaðinn og sérstaklega þegar birgðastaðan sé verri en oft áður.
Wiggen telur því mikilvægt að olíubirgðir verði auknar fyrir sumarið þegar flugumferðin eykst og þar með eftirspurnin á heimsvísu.
Spurð hvort hún telji að olíuverðið hækki enn frekar þá bendir Wiggen á að síðast þegar verðbólga var jafn há í Bandaríkjunum og hún er í dag þá hafi verðið farið upp í 140 dollara á fatið. „Og síðast þegar olíubirgðarnir voru þetta litlar, árið 2014, þá var verðið 114 dollarar,“ bætir Wiggen við.
Líkt og Túristi hefur áður fjalla um þá er olíuverðið í dag komið langt yfir þau mörk sem tilgreind voru í spám stjórnenda Play og Icelandair.