Erlendir ferðamenn í ár verða 1,1 til 1,2 milljónir samkvæmt spá Íslandsbanka sem gefin var út í morgun. Þetta er álíka fjöldi ferðamanna og árið 2015. Ef túristarnir verða ekki fleiri en þetta þá stefnir í umtalsvert offramboð á flugi til landsins í ár.
Nú í mars eru til að mynda í sölu 23 prósent fleiri áætlunarferðir frá Keflavíkurflugvelli en í sama mánuði fyrir sjö árum síðan samkvæmt ferðagögnum Túrista. Framboðið í sumar er um fimmtungi meira en það var sumarið 2015 og aukningin í október er um fimmtán af hundraði.
Til viðbótar þá er útlit fyrir að vægi erlendra flugfélaga verði hærra núna en það var árið 2015. Það eru jákvæð tíðindi fyrir ferðaþjónustuna því erlendu félögin skila hlutfallslega fleiri túristum í hverri ferð en þau íslensku gera. Skýringin liggur í áherslu íslensku félaganna á tengifarþega og Íslendinga sjálfa.
Fleiri stór flugfélög
Skýrasta dæmið um aukin umsvif erlendra flugfélaga í ár, í samanburði við árið 2015, er Wizz Air. Þotur þessa ungverska lágfargjaldafélags munu að öllu óbreyttu fljúga hingað um fjórar til fimm ferðir á dag yfir háannatímann en sumarið 2015 voru ferðirnar bara tvær á viku.
Framboð á Íslandsflugi á vegum bandarískra flugfélaga verður fjórfalt meira en það var og Lufthansa og SAS gera líka ráð fyrir mun tíðari ferðum en árið 2015. Það ár sáust þotur Air Canada og British Airways aldrei við Leifsstöð en nú í sumar mun kanadíska flugfélagið fljúga hingað daglega og British Airways er með reglulegar ferðir hingað allt árið um kring.
Íslensku flugfélögin skipta þó mestu og forstjóri Icelandair hefur gefið út að félagið horfi til þess að framboðið í ár verði að minnsta kosti 80 prósent af því sem var 2019. Það jafngildir 24 prósent aukningu frá árinu 2015. Og gera má ráð fyrir að stærð Play í ár verði á pari við það sem Wow Air var það ár.
Framboð á flugsætum í ár er því umtalsvert meira en fyrir sjö árum síðan þegar ferðamenn voru nærri 1,3 milljónir. Ef niðurstaðan verður 1,2 milljónir túrista, eins og Íslandsbanki spáir, þá liggur fyrir að annað hvort skera flugfélögin framboðið verulega niður eða sætta sig við að halda úti ferðunum með fjölda óseldra sæta.
Hótelmarkaðurinn stærri en á metárunum
Þær nærri 1,3 milljónir ferðamanna sem hingað komu árið 2015 keyptu samtals 2,5 milljónir gistinátta á íslenskum hótelum. Gistinæturnar voru aftur á móti rúmlega fjórar milljónir metárin 2018 og 2019.
Nú í heimsfaraldrinum hafa fleiri hótel bæst við og framboð af herbergjum því nokkru meira í dag en það var fyrir þremur árum síðan. Útlitið hjá hótelunum er hins vegar dökkt áfram ef ferðamannaspá Íslandsbanka gengur eftir. Alla vega ef fyrir þá hóteleigendur sem þurfa að selja meira en helminginn af herbergjunum.
Og ástandið batnar ekki mikið á næsta ári því þá spá sérfræðingar Íslandsbanka einni og hálfri milljón ferðamanna. Bataferli ferðaþjónustunnar mun því taka langan tíma samkvæmt þessu.