Þegar Willum Þór Þórsson, heilbrigðisráðherra, kynnti hertar sóttvarnaraðgerðir í gær þá vísaði hann til þess að í Svíþjóð hefðu líka gengið í gildi strangari reglur í vikunni. Þar í landi verða bareigendur þó ekki að skella í lás líkt og þeir íslensku þurfa að gera.
Sænsku reglurnar gera nefnilega ekki greinarmun á því hvort um er að ræða veitingahús eða krár. Allir mega hafa opið til klukkan ellefu á kvöldin svo lengi sem allir gestir sitja við borð. Einnig er gerð krafa um að í mesta lagi átta manns sitji saman og einnig verður að vera einn metri á milli hópa.
Íslensku reglurnar eru á annan veg. Hér mega aðeins veitingastaðir hafa opið en opnunartíminn er takmarkaðri en í Svíþjóð. Síðustu gestir íslensku veitingahúsanna verða að mæta fyrir klukkan 21 ekki má hafa opið lengur en til klukkan 22.
Kormákur Geirharðsson, eigendi Ölstofu Kormáks og Skjaldar, gagnrýndi í fréttum RÚV í gær að eingöngu veitingastaðir fengju að hafa opið næstu vikur.
„Þetta þýðir bara að núna ákveða þau að loka svona tíu krám og opna hundrað krár á veitingastöðum í borginni í staðinnh. Fólkið sem að kom til okkar hefur núna leyfi til að fara á veitingastaði. Þar eru nákvæmlega eins borð og nákvæmlega eins stólar. Þar getur fólk keypt sér bjór og sleppt því að kaupa sér mat,“ sagði Kormákur.
Stuðningur við stórum hluta á föstum kostnaði
Áður en hertu reglurnar voru boðaðar í Svíþjóð þá hafði ríkisstjórn landsins framlengt stuðning sinn við þau fyrirtæki sem hafa orðið fyrir tekjufalli vegna sóttvarnaraðgerða að undanförnu. Í Svíþjóð er reglan sú að ef tekjur fyrirtækis hafa dregist saman um meira en þrjátíu prósent þá er hægt að sækja um stuðning frá hinu opinbera. Sá stuðningur getur í mesta lagi staðið undir 90 prósent af föstum kostnaði og þar á meðal launum og húsaleigu.
