Fella þurfti niður tíu brottfarir frá Keflavíkurflugvelli á fimmtudaginn vegna óveðurs og nokkrum ferðum til viðbótar var aflýst aðra daga vikunnar sem nú er senn á enda.
Þrátt fyrir þessar breytingar á upphaflegri áætlun þá voru flugferðirnar frá landinu að jafnaði þrjátíu og sex á dag í þessari fyrstu viku ársins. Sú næsta býður upp á um fimmtungi færri ferðir. Samdráttur nemur um tíu þúsund flugsætum samkvæmt talningu Túrista.
Í þarnæstu verða brottfarirnar ennþá færri enda fækka bæði Icelandair og Play ferðum sínum þá umtalsvert vegna neikvæðra áhrifa ómíkrón afbrigðis kórónaveirunnar á eftirspurn eftir ferðalögum.
Hjá Icelandair verður gert hlé á flugi til þriggja bandaríska áfangastaða og dregið verður úr ferðum til Evrópu líka. Allt flug Play til Berlínar og London leggst af frá miðjum janúar og fram í byrjun febrúar.
Það er ekkert nýtt að umferðin um Keflavíkurflugvöll í janúar sé mest fyrstu daga ársins því jóla- og áramótavertíðin teygir sig inn í nýja árið.
Núna er niðursveiflan hins vegar hlutfallslega meiri. Í janúar 2020 fækkaði ferðunum á milli fyrstu og annarrar viku um 12 prósent en núna verður munurinn alla vega tuttugu prósent líkt og fyrr segir. Og svo ennþá meiri í þriðju viku ársins.
