Í byrjun vetrar fækkaði óseldu sætunum í þotum Ryanair umtalsvert og sætanýtingin í nóvember var til að mynda 86 prósent. Það háa hlutfall skrifast hins vegar á mjög lág fargjöld að því sem fram kemur í tilkynningu sem fylgir nýju uppgjöri félagsins sem birt var í morgun. Þar var niðurstaðan tap upp á 96 milljónir evra eða nærri 14 milljarða króna.
Í tilkynningu Ryanair segir jafnframt að þær ferðatakmarkanir sem kynntar voru til að hefta útbreiðslu ómíkrón afbrigðisins hafi dregið úr ferðalögum. Af þeim sökum hafi sætanýting Ryanair í desember sl. aðeins verið 81 prósent þrátt fyrir jóla- og áramótaferðir.
Vegna ástandsins sem ríkt hefur síðustu vikur þá skar Ryanair niður þriðjung flugáætlunar sinnar núna í janúar og stjórnendur Ryanair segja horfurnar varðandi þróun fargjalda vera óljósar. Ennþá bóki til að mynda farþegar með mjög stuttum fyrirvara og bjóða þurfi mjög lág fargjöld til að fá fólk um borð. Af þeim sökum eru hluthafar félagsins beðnir um að búa sig undir frekari raskanir í starfsemi félagsins áður en hægt sé að segja að heimsfaraldrinum sé lokið.
Þrátt fyrir þessar óljósu horfur þá eru stjórnendur Ryanair stórhuga og til marks um það þá mun félagið fimmtán nýjar starfsstöðvar í Evrópu á næstunni. Þar á meðal í Billund og Stokkhólmi. Rynair ætlar hins vegar að segja skilið við flugvöllinn í Frankfurt í Þýskalandi og segja stjórnendur félagsins að gjaldskrárhækkunum þar á bæ sé um að kenna.
Ísland er eitt fjögurra landa í Evrópu sem Ryanair flýgur ekki til en líkt og Túristi hefur áður greint frá þá hafa forsvarsmenn félagsins metið aðstæður hér á landi með reglulegu millibili.