Það verða fjórtán Boeing Max þotur í flugflota Icelandair næsta sumar en félagið tilkynnti í gær um leigu á tveimur þess háttar flugvélum til viðbótar við þær tólf sem félagið hafði áður tryggt sér. Til skoðunar var að bæta þeirri fimmtándu við en ekkert verður úr því eins og staðan er í dag.
Af þessum fjórtán Max þotum þá leigir Icelandair ellefu en í flota Play eru eingöngu leiguvélar.
Og stjórnendur Play hafa ítrekað bent á að leigukjörin sem þeir fengu hafi verið mjög hagstæð. Sérstaklega þar sem félagið þurfti í upphafi eingöngu að borga fyrir hvern floginn klukkutíma í stað þess að greiða fasta leigu á mánuði.
Forsvarsfólk Play er ekki það eina sem hefur hrósað happi yfir að hafa tryggt sér þess háttar kjör. Það gerðu stjórnendur Norwegian líka í desember sl. þegar þeir sögðu frá nýjum samningi um leigu á tveimur Boeing Max þotum. Þá kom fram í tilkynningu frá norska félaginu að samið hefði verið um að leigan næstu tvo vetur myndi miðast við notkun en ekki fast gjald. Kosturinn við þetta fyrirkomulag, að mati stjórnenda Norwegian, er sá að með þessu geta þeir stillt framboðinu í hóf á þeim tíma sem færri eru á ferðinni.
Spurður hvort Icelandair hefði líka sóst eftir sambærilegum kjörum og keppinautarnir þá segir Bogi Nils Bogason, forstjóri Icelandair, að það hafi ekki verið gert.
„Það eru mörg atriði í svona leigusamningum sem í heild mynda kjörin sem er samið er um. Við hefðum örugglega getað samið um „Power by the hour“ í einhvern tíma en það hefði komið niður á öðrum atriðum samningsins. Við stefnum á að nýta Max vélarnar vel allt árið um kring og erum mjög ánægð með kjörin í þessum samningum,“ skrifar Bogi í svari til Túrista.
Líkt og forstjóri Icelandair bendir á þá eru leigugreiðslur sem miðast við notkun aðeins í boði í takmarkaðan tíma. Til marks um það þá hefur Play þurft að greiða fulla leigu af sínum þotum frá og með áramótum. Félagið heldur þó uppteknum hætti og lætur flugvélarnar standa óhreyfðar á Keflavíkurflugvelli á miðvikudögum.