Á árunum 2013 til 2019 fóru að jafnaði um fimmtíu þúsund farþegar um innanlandsflugvellina í janúar ár hvert. Þeim fækkaði umtalsvert áður en heimsfaraldurinn hófst en staðan hefur versnað til muna.
Í nýliðnum janúar flugu nefnilega rétt tæplega þrjátíu þúsund farþegar innanlands eða litlu fleiri en þeir voru í janúar 2021 eins og sjá má hér fyrir neðan. Sóttvarnaraðgerðir vegna Covid-19 voru umtalsverðar í þessum tveimur mánuðum.
Ef horft er til þróunar eftir flugvöllum þá sést að það fóru helmingi færri um Akureyrarflugvöll í nýliðnum janúar í samanburði við janúar 2019. Samdrátturinn á Reykjavíkurflugvelli og á Egilsstöðum er minni.
Meiri samdráttur fyrir norðan skrifast á þá staðreynd að erlendar ferðaskrifstofur hafa haldið úti beinu flugi til Akureyrar í byrjun hvers árs. Engar þess háttar ferðir voru á dagskrá í janúar í fyrra eða í ár en í síðustu viku hófst á ný leiguflug frá Amsterdam til Akureyrar. Þar með fjölgar farþegum í millilandaflugi fyrir norðan en í farþegatölum Isavia eru þeir ekki aðgreindir frá þeim fljúga innanlands.