FL-Group, þáverandi móðurfélag Icelandair, gekk frá samningum við Boeing um kaup á allt að sjö Dreamliner þotum árið 2005. Þá var reiknað með að fyrstu þoturnar yrðu afhentar fimm árum síðar en bandaríski flugvélaframleiðandinn stóð ekki við það. Árið 2011 tók Norwegian yfir kauprétt Icelandair sem þá var kominn niður í þrjár þotur.
Norska félagið varð að bíða í tvö ár í viðbót eftir flugvélunum því það var fyrst seinni hluta árs 2013 sem Boeing kláraði vélarnar þrjár sem Icelandair hafði pantað átta árum áður.
Þessi langa bið skrifaðist meðal annars á þriggja mánaða kyrrsetningu allra Dreamliner þota í ársbyrjun 2013 eftir endurteknar bilanir í rafkerfi vélanna. Þegar Boeing hafði lagað þann galla fengu kaupendur loks þoturnar sínar en stjórnendur Norwegian voru samt alltaf í vandræðum með sín eintök. Aðallega voru það Rolls Royce hreyflarnir sem biluðu reglulega.
Það voru þó ekki bara eintökin sem Norwegian fékk sem reyndust gölluð og því ákváðu flugmálayfirvöld vestnahafs í fyrra að banna Boeing að afhenda fleiri þotur. Það bann er ennþá í gildi og í lok síðasta árs stóðu samtals 110 Dreamliner tilbúnar þotur við verksmiðjur Boeing. Þær fá hins vegar ekki vottun frá bandarískum flugmálayfirvöldum.
Af þessum sökum hafa flugfélög þurft að draga úr áætlunum sínum fyrir sumarið. Eitt þeirra er American Airlines sem bíður eftir þrettán nýjum vélum. Og á föstudaginn síðasta gáfu stjórnendur félagsins út að dregið yrði enn frekar úr áformum um millilandaflug í sumar. Þar á meðal annars verður ekkert af ferðum milli Seattle – London en á þeirri flugleið er bandaríska félagið í óbeinum hætti í samkeppni við Icelandair.
Heimildir Wall Street Journal herma að Boeing geti í fyrsta lagi afhent Dreamliner þotur á ný í vor eða jafnvel ekki fyrr en í sumar.
Starfsfólk Boeing stendur í ströngu á fleiri sviðum þó framleiðsla á Boeing Max þotum sé loks komin á skrið á ný. Endalausar tafir hafa nefnilega orðið á fyrstu eintökunum af breiðþotunum Boeing 777x. Upphaflega áttu þau að vera tilbúin í byrjun 2020 en nú gerir Boeing ekki ráð fyrir þeim fyrr en í byrjun næsta árs.
