Um helmingur farþega SAS fyrir heimsfaraldur var að ferðast vegna vinnu en nú reikna stjórnendur félagsins með að þessi kúnnahópur hafi skroppið saman. Af þeim sökum verður nú meiri áhersla lögð á þá sem eru að ferðast á eigin vegum og það kallar á breytingar í leiðakerfi flugfélagsins og flugflota.
Fyrsta skrefið í þeirri vegferð er opnun starfsstöðvar í Bergen í Noregi og fleiri ótilgreinar verða opnaðar á næstunni. Með þessu ætlar félagið ekki bara að fjölga ferðunum innan Skandinavíu heldur auka millilandaflug frá minni borgum. Þetta er meðal þess sem fram kom í máli stjórnenda SAS á afkomufundi félagsins í gærmorgun.
Veðja á nýjar minni Airbus þotur
Um leið er ætlunin að fækka breiðþotum í flota félagsins og sækja fram með minni vélum. Þar á meðal langdrægum Airbus A321LR þotum. SAS er nú þegar farið að fljúga þessa háttar flugvélum beint frá Kaupmannahöfn til Boston og í sumar verða þær einnig nýttar í flug til Toronto í Kanada.
Þetta verður í fyrsta sinn sem SAS flýgur til kanadísku borgarinnar en þangað hefur Icelandair haldið út reglulegu flugi í árabil. Farþegar á leið þaðan til Noregs hafa því lengi átt þann kost að fljúga með Icelandair til Keflavíkurflugvallar og svo valið á milli ferða Icelandair til bæði Óslóar og Bergen.
Á sama hátt geta farþegar frá þessum tveimur norsku borgum á leið til Norður-Ameríku flogið með Icelandair yfir hafið með millilendingu á Keflavíkurflugvelli.
Jafnlengi með millilendingu í Ósló
Play ætlar einnig að sækja á norsku miðin með ferðum til bæði Þrándheims og Stavanger. Norðmenn komast þá samdægurs með íslenska félaginu alla leið yfir á austurströnd Bandaríkjanna á álíka löngum tíma og það tekur þá að fljúga fyrst til Óslóar og þaðan yfir Atlantshafið með SAS. Ferðir félagsins, út fyrir Evrópu, takmarkast nefnilega við brottfarir frá höfuðborgunum Skandinavíu.
Opnar fyrir fleiri möguleika hjá SAS
Spurður hvort það fyrirkomulag sé til endurskoðunar þá segir talsmaður SAS, í svari til Túrista, að engar ákvarðanir hafi verið teknar um að hefja flug út í heim frá minni flugvöllum í Noregi. Það liggi þó fyrir að SAS ætli almennt að sækja fram með því að auka framboð á ferðum út fyrir Evrópu.
„Nýjar flugvélategundir og fleiri starfsstöðvar eru meðal þeirra þátta sem gætu opnað á flug frá fleiri stöðum en Ósló. Svo lengi sem það er hagkvæmt og eftirspurnin er til staðar frá viðskiptavinunum,“ útskýrir John Eckhoff talsmaður SAS í Noregi.
Hvað borgir næst?
Sem fyrr segir horfa stjórnendur SAS til að fjölga heimahöfnum félagsins og fyrsta viðbótin er Bergen. Gera má ráð fyrir að stjórnendur flugfélagsins horfi líka til næststærstu flugvallanna í Danmörku og Svíþjóð, það er Billund á Jótlandi og Gautaborgar í vesturhluta Svíþjóðar. Til þeirrar fyrrnefndu fljúga þotur Icelandair á sumrin og Play fer jómfrúarferð sína til sænsku borgarinnar í sumarbyrjun. Hvort þotur SAS fari að fljúga þaðan til Norður-Ameríku á næstu árum á eftir að koma í ljóst.
Fyrst þurfa stjórnendur SAS og starfsmenn að ná saman um breytta kjarasamninga og eins þurfa eigendur flugfélagsins að ákveða hvort leggja eigi aukið fé í reksturinn. Í dag fara sænska og danska ríkið saman með um helmingshlut í þessu stærsta flugfélagi Norðurlanda.
