Það var í byrjun desember sl. sem Play fór jómfrúarferð sína til Schiphol flugvallar og þar með gátu farþegar á leið milli Íslands og höfuðborgar Hollands valið úr ferðum þriggja flugfélaga.
Frá og með lokum mars verða það þó eingöngu þotur Icelandair og Transavia sem munu fljúga þessa leið. Play fékk nefnilega ekki afgreiðslutíma á hollenska flugvellinum í sumar en formlega hefst sumaráætlun fluggeirans þann 27. mars.
Daginn áður fer Play því sína síðustu ferð til Amsterdam, í bili að minnsta kosti, því samkvæmt upplýsingafulltrúa félagsins hefur ekki verið tekin ákvörðun um hvort óskað verði eftir lendingarleyfum þar næsta vetur.
Það hefur heldur ekki verið tekin ákvörðun um hvert þotur Play munu fljúga í staðinn fyrir ferðirnar til Amsterdam. En líkt og fram í frétt Túrista í byrjun mánaðar þá horfðu stjórnendur Play ekki til þess að leita fyrir sér á öðrum hollenskum flugvöllum ef sú staða kæmi upp að félagið fengi ekki slott á Schiphol flugvelli.
Löng hefði fyrir tíðum ferðum
Amsterdam hefur lengi verið ein arðbærasti áfangataðurinn í leiðakerfi Icelandair sem skrifast bæði á fraktflutninga og fjölda tengifarþega. Þannig hóf Wow Air fyrsta að fljúga til Amsterdam yfir vetrarmánuðina eftir að félagið var komið með áætlunarflug til Bandaríkjanna. Hollenskir ferðamenn eru líka fjölmargir hér á landi því árið 2019 komu hingað um 43 þúsund Hollendingar eða álíka margir og metárið 2018.