Það voru rétt um 121 þúsund útlendingar sem flugu frá Keflavíkurflugvelli í janúar 2020 og í þeim mánuði nam veltan með erlend greiðslukort hér á landi nærri fjórtán milljörðum króna.
Af þeirri upphæð fór um 3,3 milljarðar kr. í greiðslur fyrir gistingu samkvæmt tölum Rannsóknarseturs verslunarinnar. Það jafngildir um 26.800 krónum á hvern erlendan farþega sem innritaði sig í flug í Leifsstöð í janúar 2020. Í nýliðnum janúar fór þessi upphæð hins vegar niður í 19.700 krónur.
Vægi gistiþjónustu í heildarveltu erlendra greiðslukorta hér á landi féll milli þessara tveggja janúarmánaða úr 24 prósentum niður í 18 prósent. Aftur á móti fengu verslanir, veitinghús og bílaleigur hærri skerf af kökunni í janúar eins og sjá má hér fyrir neðan. Þetta er í takt við þróun síðustu mánaða líkt og Túristi hefur áður fjallað um.
Það er ekki bara gistigeirinn sem nú fær hlutfallslega minna af kortaveltu útlendinga. Það sama á við um fyrirtæki sem gera út á ýmis konar afþreytingu fyrir ferðafólk. Útgjöld í þennan flokk eru flokkuð undir heitinu „ýmis ferðaþjónusta“ í gögnum Rannsóknarseturs ferðaþjónustunnar og þar lækkuðu meðalútgjöldin úr 28.700 kr. á mann niður í 14.500 kr. Skýringin á því gæti meðal annars legið í þeirri staðreynd að aflýsa þurfti fjölda ferða vegna veðurs í síðasta mánuði.
Við þennan samburð hér að ofan verður að setja ákveðna fyrirvara. Íslendingar búsettir í útlendum nota erlend kort þegar þeir eru staddir á Íslandi og á sama tíma má gera ráð fyrir að hluti þeirra útlendinga sem taldir eru sem erlendir farþegar á Keflavíkurflugvelli séu í raun búsettir á Íslandi. Og hluti þeirra þá með íslensk greiðslukort. Einnig hefur það áhrif á kortaveltuna að ferðamenn hafa oft greitt fyrir gistingu og afþreyingu áður en þeir koma til landsins. Þess háttar viðskipti eru því ekki meðtalin í tölum Rannsóknarseturs verslunarinnar.
