Seinnpartinn á föstudag rauk olíuverð upp og virði erlendra flugfélaga tók dýfu. Sér í lagi þeirra bandarísku enda voru kauphallir í Evrópu að loka þegar fréttir fóru að berast af auknum líkum á innrás Rússa á Úkraínu.
Í íslensku kauphöllinni misstu Icelandair og Play ekki flugið og gengi þess síðarnefnda hækkaði um nærri tvo af hundraði á föstudaginn.
Icelandair var svo hástökkvari vikunnar því markaðsvirði félagsins var 8 prósentum hærra seinnipartinn á föstudaginn en það var á mánudagsmorgun eins og sjá má hér fyrir neðan.