Það var sumarið 2013 sem Icelandair fór jómfrúarferð sína til Sankti Pétursborgar en þetta var í fyrsta sinn sem félagið hélt úti áætlunarflugi til Rússlands. Flugleiðin var hins vegar lögð niður haustið 2014 og þá gáfu forsvarsmenn Icelandair þær skýringar að eftirspurn Rússa eftir utanlandsferðum hefði dvínað í kjölfar átaka Rússa og Úkraínu á Krímskaga.
Flugsamgöngur milli Íslands og Rússlands komust á að nýju sumarið 2018 þegar rússneska flugfélagið S7, áður Siberia Airlines, hóf flug hingað frá Moskvu. Félagið hélt úti vikulegum ferðum hingað fyrsta sumarið og árið eftir voru ferðirnar tvær í viku yfir sumarmánuðina þrjá.
Vegna Covid-19 faraldursins hefur flugið legið niðri síðustu tvö ár en nú ætla stjórnendur S7 að taka upp þráðinn á Keflavíkurflugvelli. Sumaráætlun félagsins gerir nefnilega ráð fyrir flugi til Íslands alla laugardaga í sumar og fyrsta brottför er á dagskrá þann 4. júní. Hvort núverandi spenna í samskiptum Rússa og Úkraínu eigi eftir að riðla þeim áformum á eftir að koma í ljós.
Áhrif beinna flugsamgagna á ferðamannastrauminn hingað frá Rússlandi hafa verið töluverð. Sumarið 2012 komu hingað um 2400 rússneskir ferðamenn en fjöldinn fór upp í fjögur þúsund sumarið sem Icelandair hóf flugið til Sankti Pétursborgar. Og sumarið 2019 taldi hópurinn níu þúsund manns en þá voru ferðir S7 líka tvær í viku. Svo tíðar ferðir eru ekki planaðar nú í sumar.
