Þó flogið hafi verið daglega frá Keflavíkurflugvelli til Tenerife í janúar þá kemst spænska eyjan ekki á lista með þeim fimm áfangastöðum sem oftast var flogið til í janúar.
Ferðirnar þurfa nefnilega að vera ennþá tíðari til að komast á þann lista. Meira segja á þessum tíma árs. París kemst til að mynda aðeins í fimmta sætið en þangað voru farnar 47 ferðir í janúar á vegum þriggja flugfélaga.
Brottfarirnar til Manchester voru þremur fleiri en í byrjun hvers árs fjölgar ferðunum til bresku borgarinnar umtalsvert vegna áhuga Breta á vetrarferðum til Íslands. Stórtækast í fluginu milli Manchester og Íslands er Easyjet sem bætir enn við ferðum nú febrúar.
Í þriðja sæti á listanum fyrir janúar er Amsterdam en þangað flugu þotur Icelandair, Play og Transavia samtals 53 ferðir í nýliðnum mánuði.
Til Kaupmannahafnar fljúga líka þrjú flugfélög og skiptu þau á milli sín 74 ferðum. London var hins vegar sú borg sem langoftast var flogið til í janúar. Samtals voru ferðirnar 126 samkvæmt talningu Túrista og skiptust þær á fjóra flugvelli í nágrenni við bresku höfuðborgina.