Það eru alla jafna ekki margir á ferðinni í janúar ef frá eru taldir fyrstu dagarnir eftir áramót. Í janúar 2020 fóru þannig 17 prósent færri farþegar um Leifsstöð í samanburði við desember árið áður.
Samdrátturinn í flugáætlun Icelandair á milli þessara tveggja mánaða var álíka eða fimmtán prósent samkvæmt talningum Túrista.
Í nýliðnum janúar voru ferðir á vegum Icelandair sautján prósent færri en í desember á síðasta ári. Breytingin er því ekki mikil á milli þessara tveggja tímabila þrátt fyrir að ómíkrón afbrigðið hafi komið til sögunnar í árslok og dregið úr ferðalögum milli landa.
Hjá Play fækkaði ferðunum í janúar um 24 prósent frá því í desember sem er hlutfallslega nokkru meiri samdráttur en hjá Icelandair. Í þeim samanburði má þó hafa í huga að umsvif félaganna eru ólík. Icelandair flaug að jafnaði fimmtán ferðir á dag frá landinu í janúar á meðan meðaltalið hjá Play var rétt rúmlega tvær ferðir á dag.
Bæði félög birta farþegatölur sínar í næsta mánuði og þá sést hvort farþegum hafi fækkað hlutfallslega í takt við framboðið.
Hvort forsvarsmenn félaganna deili svo með fjárfestum upplýsingum um fargjaldaþróunina á eftir að koma í ljós en forsvarsmenn Ryanair fela það ekki að farmiðaverðið hefur verið á niðurleið að undanförnu. Á sama tíma hefur olíuverðið verið á uppleið og gera má ráð fyrir að forstjórar flugfélaganna tveggja komist ekki hjá því að ræða þá þróun þegar þeir kynna uppgjör síðasta árs. Kaup á þotueldsneyti vega nefnilega mjög þungt í rekstri flugfélaga og sérstaklega núna þegar verðið er svona hátt.