Það voru rétt 190.488 farþegar sem fóru um Keflavíkurflugvöll í janúar sem er viðbót um 168 þúsund farþega frá sama tíma í fyrra. Ef horft er lengra aftur í tímann þá jafnast fjöldinn í nýliðnum janúar við það sem var á sama tíma árið 2014 eins og sjá má á línuritinu.
Ef borið er saman við janúar 2020 þá voru farþegarnir um helmingi færri í nýliðnum janúar en aftur á móti fækkaði flugferðunum hlutfallslega mun minna eða um þriðjung eins og Túristi hefur áður greint frá. Tómu sætin í flugferðunum til og frá Keflavíkurflugvelli hafa því verið miklu fleiri að þessu sinni.
Það endurspeglast til að mynda í farþegatölum Icelandair. Í síðasta mánuði var sætanýtingin hjá millilandaflugi hjá félaginu rétt 59,5 prósent en 73,2 prósent í janúar árið 2020.