Stríðsátök eru hafin í Evrópu með innrás Rússa í Úkraínu í nótt. Hlutabréfavísitölur í evrópskum kauphöllum hafa lækkað hratt í fyrstu viðskiptum dagsins og verð á hráolíu fór yfir eitt hundrað dollara markið. Þetta er í fyrsta sinn síðan árið 2014 sem verð á olíu hefur verið svo hátt.
Verð á einu tonn af þotueldsneyti nálgast 900 dollara sem er um þriðjungi hærra verð en var að jafnaði á fjórða ársfjórðungi í fyrra. Á því tímabili greiddi Icelandair rúma fimm milljarða króna fyrir eldsneyti á flugflotann sinn. Það jafngildir um 9.700 krónum á hvern farþega. Þó bera að hafa verður í huga að Icelandair er stórtækt í vöruflutningum og það þyngir þotur félagsins umtalsvert sem kallar á meira eldsneyti.
Play hefur ekki birt uppgjör sitt fyrir síðasta ársfjórðung en á þeim þriðja í fyrra greiddi Play um 350 milljónir fyrir eldsneyti og stóð sá útgjaldaliður undir 17 prósentum af rekstrarkostnaði. Olíuverðið í dag er allt að helmingi hærra í dag en það var á tímabilinu júlí til september í fyrra.
Play er ekki með framvirka samninga um kaup á eldsneyti en Icelandair er með þess háttar. Þessi fyrirfram kaup Icelandair dekka hins vegar minna af eldsneytisþörfinni en þau gerðu fyrir heimsfaraldur.