Landsvirkjun og Icelandair ætla að taka höndum saman við þróun lausna í orkuskiptum í flugi á Íslandi.
Saman ætla fyrirtækin að leggja mat á núverandi stöðu og undirbúa verkefni, sem munu stuðla að
framgangi í orkuskiptum í flugi samkvæmt því sem fram kemur í tilkynningu.
Þar segir að markmiðin með verkefninu séu þrjú. Í fyrsta lagi að leggja mat á möguleika þess að hrinda í framkvæmd þróunarverkefni, þar sem fyrstu skref orkuskipta í flugi yrðu stigin. Í öðru lagi að skapa vettvang hagaðila og stuðla að samvinnu varðandi orkuskipti í flugi og í þriðja lagi er stefnt að því að fræða almenning og hagaðila um mikilvægi orkuskipta í flugi og hvaða skref þarf að taka.
Hörður Arnarson, forstjóri Landsvirkjunar, segir mjög ánægjulegt að orkufyrirtæki þjóðarinnar og stærsta
flugfélagið hafi ákveðið að leggjast saman á árarnar, til að vinna að orkuskiptum í flugi.
„Orkuskipti í samgöngum eru óhjákvæmileg og þau eru þegar á fullri ferð að því er fólksbílana varðar. Við þurfum líka að finna lausnir fyrir þungaflutninga, skip og flugvélar og það er ekki eftir neinu að bíða.“
Bogi Nils Bogason, forstjóri Icelandair, skrifar í tilkynningu að flugfélagið bindi góðar vonir við að samstarfið muni skila raunhæfum, sameiginlegum tækifærum. „Óskastaðan er sú að Ísland verði í fararbroddi í orkuskiptum í flugi. Fyrst um sinn er raunhæft að horfa til orkuskipta í innanlandsflugi en við erum í einstakri stöðu hér á landi vegna stuttra flugleiða innanlands og aðgengis að grænni orku. Auk þess getur lega landsins milli Evrópu og Norður Ameríku skapað tækifæri þegar kemur að orkuskiptum í millilandaflugi,“ segir Bogi.
