Vetraráætlun fluggeirans lýkur formlega í lok mars og það stefnir í að ferðir á vegum erlendra flugfélaga til og frá Keflavíkurflugvelli verði aðeins meiri þá en nú í febrúar. Núna eru í sölu um 380 brottfarir í mars á vegum þeirra erlendu sem er viðbót um nærri fimmtung frá því nú febrúar.
Í samanburði við mars 2019 þá verða ferðirnar hins vegar fjórðungi færri. Þetta sýna talningar Túrista á því Íslandflugi sem er í sölu í dag á heimasíðum erlendra flugfélaga og ferðaskrifstofa.
Tvö félög með meira en helming
Sem fyrr eru það Easyjet og Wizz Air sem eru langumsvifamest í Íslandsflugi erlendra flugfélaga. Skiptir þá engu þó Easyjet hafi fækkað ferðunum hingað um nærri því helming frá því í mars 2019. Núna stefnir breska félagið á 111 ferðir hingað frá Bretland en á dagskrá Wizz Air eru 96 ferðir frá sex evrópskum löndum. Þar af frá fjórum ítölskum borgum en í lok mars tekur Wizz Air upp þráðinn í flugi hingað frá Napólí og Róm. Jómfrúarferð félagsins til Íslands frá Feneyjum er svo á áætlun þann 29. mars.
Í heildina munu Wizz Air og Easyjet standa undir ríflega annarri hverri brottför erlendra flugfélaga frá Keflavíkurflugvelli í næsta mánuði.
Flestar ferðir til Bretlands
Bretar sækjast helst eftir Íslandsferðum í febrúar og mars og það þarf því ekki að koma á óvart að framboð í næsta mánuði er mest þegar kemur að flugi milli Íslands og Bretlands. Þar á eftir kemur Mið-Evrópa enda tíðar ferðir á boðstólum til borga eins og Amsterdam, Parísar og Frankfurt. Fimmta hver þota sem tekur á loft frá Keflavíkurflugvelli í næsta mánuði setur svo stefnuna á Norður-Ameríku. Og allar verða flugvélarnar merktar Icelandair því það er fyrst í apríl sem félagið fær á ný samkeppni í flugi vestur um haf.