Í venjulegu árferði koma hingað fleiri breskir túristar í febrúar en yfir sumarið. Árið 2019 flugu til að mynda 43 þúsund breskir farþegar frá Keflavíkurflugvelli í febrúar en þeir voru samtals 34 þúsund í júní, júlí og ágúst það ár.
Og það eru vísbendingar um að hingað streymi nú breskir ferðamenn á nýjan leik. Í gær lentu til að mynda tólf þotur á Keflavíkurflugvelli eftir flug frá Bretlandi. Níu þeirra voru á vegum Easyjet á meðan Icelandair, British Airways og Wizz Air voru hvert og eitt með staka ferð frá London.
Skýringin á þessum mikla fjölda ferða frá Bretlandi í gær liggur að hluta til í óveðrinu á mánudaginn. Þá féll nærri allt flug niður og ferðunum þá frestað til gærdagsins.
Í dag voru á dagskrá Keflavíkurflugvallar sex komur frá Bretlandi og á morgun verða þær ellefu og þar af er von á fjórum þotum frá Manchester.