Flugfarþegar frá Malasíu eru ekki flokkaðir sérstaklega í talningu Ferðamálastofu á Keflavíkurflugvelli og að sama skapi birtir Hagstofan ekki fjölda gistinátta sem malasískir ferðamenn kaupa á íslenskum hótelum.
Fjöldi ferðamanna frá Malasíu mun þó aukast töluvert ef áform eigenda Icelandairhótelanna ganga eftir. Því þar er unnið að átaki um sölu Íslandsferða frá Malasíu en hótelkeðjan eru í eigu malasíska fyrirtækisins Berjaya Land Berhad.
Að sögn Syed Ali Shahul Hameed, forstjóra Berjaya Land, þá eiga sér stað viðræður við nokkur flugfélög og ferðaskrifstofur um skipulagningu pakkaferða frá Malasíu til Íslands. Þetta kemur fram í viðtali við forstjórann í New Straits Times.
Hann bætir því við að vonir standi til að fleiri Íslendingar kjósi að ferðast til Malasíu og þá gista á hótelum Berjaya samsteypunnar þar í landi.
„Við hlökkum til að vinna náið með ferðamálayfirvöldum beggja landa og vonumst til að þetta frumkvæði leiði til þess að fleiri ferðist milli Íslands og Malasíu á næstu árum,“ segir Shahul Hameed jafnframt í viðtalinu við New Straits Times.
Heiti hótelfyrirtækisins verður breytt
Berjaya keypti 75 prósent hlut í Icelandair hótelunum í apríl 2019 og borgaði fyrir hann 6,5 milljarða króna. Stuttu eftir að heimsfaraldurinn hófst í hittifyrra var gengið frá sölu á síðasta fjórðungnum og fyrir hann greiddi Berjaya 440 milljónum kr.
Í heildina borgaði malasíska fyrirtækið þá nærri sjö milljarða króna fyrir hótelkeðjuna en þegar fyrst var kynnt um söluna á 75 prósent hlutnum til Berjaya í árslok 2019 voru þau viðskipti metin á tíu milljarða króna.
Áður hefur komið fram að það sé ekki ætlunin að þetta næst stærsta hótelfyrirtæki landsins verði kennt mikið lengur við fyrrum eiganda, þ.e. flugfélagið Icelandair.